Hvernig getum við talað um gervigreind með nemendum?

Umræðuæfing: Hvað þýðir notkun gervigreindar í námi?

Markmið:
Að skapa vettvang fyrir opið samtal um hlutverk og áhrif gervigreindar í háskólanámi. Æfingin miðar að því að efla siðferðislega meðvitund nemenda og dýpka skilning þeirra á því hvernig notkun slíkra tækni hefur áhrif á nám, kennslu og námsmat.

Framkvæmd:

  1. Kennari gefur nemendum stutta spurningu eða kveikju í kennslustund:
  2. „Hvenær er notkun gervigreindar hjálpleg – og hvenær getur hún orðið til vandræða?“ eða, „Er alltaf augljóst hvar mörkin liggja milli eigin hugmynda og hugmynda frá gervigreind?“

Nemendur ræða saman í litlum hópum eða öll saman í opnu samtali. Gott er að nota dæmi úr námskeiðinu eða fyrra verkefni til að tengja umræðuna beint við námið.

Spurningar sem hægt er að leggja fyrir nemendur:

  • Hvaða tækifæri og áskoranir fylgja gervigreind í námi?
  • Hvernig getur gervigreind dregið úr eða eflt sjálfstæða hugsun?
  • Hvernig vitum við hvað nemandi gerði sjálfur og hvað gervigreind hjálpaði með?
  • Hvað á að koma fram um notkun gervigreindar í verkefnum?

Framhald:
Að umræðu lokinni skrifa nemendur stutta hugleiðingu eða draga saman helstu atriði umræðunnar. Niðurstöðurnar má nýta sem grunn að sameiginlegum viðmiðum eða „leikreglum“ um notkun gervigreindar í námskeiðinu.

Ávinningur af aðferðinni:

  • Nemendur fá tækifæri til að ræða siðferðileg og hagnýt atriði á eigin forsendum.
  • Kennari fær innsýn í þekkingu, viðhorf og væntingar nemenda.
  • Samræður stuðla að meira gagnsæi og trausti í námsumhverfinu.

Kennsluæfing: Hvað segir gervigreindin — og hvað segir þú?

Markmið: Að efla gagnrýna hugsun um notkun gervigreindar í háskólanámi og vekja umræðu um gæði, nákvæmni og ábyrgð í fræðilegri vinnu.

Framkvæmd:
Kennari setur prófspurningu, ritgerðarverkefni eða rannsóknarviðfangsefni inn í spjallmenni (eins og Copilot eða ChatGPT) fyrir framan nemendur. Svörin sem forritið skilar eru síðan greind og rædd í sameiginlegri umræðu eða í hópavinnu.rin eru síðan rædd í hópum eða saman af öllum bekknum. 

Nemendur vinna í litlum hópum með eftirfarandi spurningar:

  • HHvað er réttmætt og vel rökstutt í svari gervigreindarinnar – og hvað stenst ekki fræðilega skoðun?
  • Er svarið of almennt, hlutdrægt eða byggt á röngum forsendum?
  • HHvaða dæmi eða heimildir vantar til að styrkja svarið?
  • Hvernig má betrumbæta svarið þannig að það uppfylli kröfur um fræðilega nákvæmni, dýpt og samhengi?

Framhald:
Hóparnir kynna niðurstöður sínar og leggja til úrbætur á svörunum, t.d. með því að bæta við viðeigandi heimildum, útskýringum eða tengja efnið við námsmarkmið og fræðileg viðmið.

Ávinningur af aðferðinni:

  • Nemendur fá raunhæfa innsýn í hvernig gervigreind getur framleitt efni sem virðist sannfærandi en reynist við nánari skoðun vera yfirborðskennt, ónákvæmt eða hlutdrægt.
  • Nemendur læra að greina á milli þess sem hljómar rétt og þess sem stenst fræðileg viðmið.
  • Hópavinna hvetur til samvinnu, gagnrýnnar hugsunar og dýpri skilnings á viðfangsefninu
  • Kennari fær tækifæri til að undirstrika mikilvægi nákvæmni, samhengi og ábyrgrar akademískrar vinnu í háskólanámi.