Leiðsagnarmat

Í leiðsagnarmati endurmeta nemendur sig sífellt sjálfir á meðan þeir vinna verkefnin og skynja því betur hvernig þeim miðar áfram í takt við markmiðin.
Einn lykilþátta í leiðsagnarmati er endurgjöf. Endurgjöfina ætti að nýta til að valdefla nemendur þannig að þeir taki aukna ábyrgð á eigin námi. Nemendur taka frekar ábyrgð á lærdómsferlinu, setja sér markmið og finna aðferðir til að ná markmiðum sínum. Þeir þurfa einnig að taka ábyrgð á námsefninu, vinnunni sem þeir leggja í lærdóminn, hvernig þeir bregðast við endurgjöf og taka ábyrgð á verkefninu eða afurð vinnu sinna sjálfir. Endurgjöfin frá kennara er áhrifaríkari eftir því sem nemendur eru betri í að nýta sér hana og eftir því sem þeir eru betur í stakk búnir til að meta sig sjálfir.

Þegar leiðsagnarmati er beitt þurfa kennarar þurfa að hafa eftirfarandi grundvallaratriði í huga, til þess að ná fram auknum námsárangri og aukinni ábyrgð nemenda á eigin námi:

-Markmiðin með náminu eru skýr og viðmið um árangur í öllum verkefnum einnig.
-Endurgjöfin vísar veginn og hvetur til sjálfsígrundunar nemandans og að hann geti sjálfur metið hvar hann stendur.
-Í endurgjöfinni eru hágæða upplýsingar til nemendanna um hvar þeir standa í náminu.
-Endurgjöfin hvetur til samtals bæði milli nemenda og kennara og einnig milli nemendanna sjálfra um námið.
-Endurgjöfin er þannig að hún er hvetjandi og ýtir undir áhugahvöt, trú nemandans á eigin getu og eykur þannig sjálfstraust hans í náminu.
-Endurgjöfin leitast við að brúa bilið milli þess hvar nemandinn er staddur og þangað sem hann ætlar, í átt að markmiðum.
-Endurgjöfin veitir kennurum upplýsingar um hvernig hann getur aðlagað kennslu sína.

Með því að breyta námsmatsaðferðum þá breytast kennsluhættir ósjálfrátt í takt við breyttar námsmatsaðferðir. Leiðsagnarmat ýtir undir nemendamiðaða kennslu og eykur tengsl nemenda og kennara þar sem matið fer fram að einhverju leyti í gegnum samtöl (Nicol, D. J., og  Macfarlane‐Dick, D. 2006).

Upplýsingar um aðferðir við endurgjöf