Rafræn próf
Inspera er rafrænt prófakerfi HÍ. Það býður upp á mikið öryggi í próftöku, fjölda spurningagerða og einkunnir úr Inspera prófum er hægt að birta í einkunnabók Canvas.
Rafrænt próf í Inspera hefur marga kosti, hvort sem það er lagt fyrir sem heimapróf eða í stofu. Kennari getur nálgast úrlausnir nemenda strax og prófi lýkur og kerfið getur farið sjálft yfir þá hluta prófs þar sem búið er að skilgreina rétt svör fyrirfram. Yfirferð er ávallt nafnlaus í Inspera.
Öll próf nemenda eru á einum stað og engir pappírsbunkar sem þarf að ferðast með á meðan farið er yfir og hægt að nálgast úrlausnirnar úr nettengdri tölvu.
Kerfið er mjög öruggt og próftaka nemenda getur farið fram í læstu umhverfi. Jafnvel þó svo að netsamband rofni á meðan á próftöku stendur er ekki hætta á að svör nemenda týnist. Hægt er að veita nemendum endurgjöf á einstök svör eða heil próf í kerfinu.
Kennarar geta nálgast yfirgripsmiklar leiðbeiningar um Inspera í Uglu og fengið aðstoð við fyrirlögn prófa hjá starfsmönnum prófaskrifstofu.
Algengar spurningar
Ítarlegar leiðbeiningar fyrir kennara eru aðgengilegar í Uglunni - smelltu hér til að skoða leiðbeiningar.
Upptökur af námskeiðum í Inspera má finna á Youtube rás prófaskrifstofu.
Í Canvas er prófakerfi líka og eðlilegt að kennarar spyrji sig hvort kerfið þeir eigi að nota.
Við fyrirlögn allra loka- og misserisprófa sem hafa stífan tímaramma og hafa mikið vægi í lokaeinkunn nemenda er eindregið mælt með því að kennarar noti Inspera.
Helstu ástæðurnar eru þessar:
- Prófaskrifstofa hefur yfirsýn í allar prófatökur sem eru í gangi í Inspera á hverjum tíma.
- Upplýsingar um lengri próftíma flyst sjálfkrafa úr Uglu í Inspera
- Engin hætta er á að úrlausnir tapist þó svo að netsamband rofni á meðan á prófi stendur
- Prófaskrifstofa er með gátlista fyrir öll Inspera próf sem ætti að tryggja örugga fyrirlögn prófa
Canvas Quiz er hins vegar heppilegt fyrir óformlegri próf þar sem markmiðið er frekar að veita kennara og nemanda yfirsýn yfir þekkingaratriði, til þess að æfa nemendur í hugtakaskilningi o.s.frv.
Kennarar geta óskað eftir aðstoð við framkvæmd prófa hjá prófaskrifstofu, hvort sem það er að óska eftir að skrifstofan sjái um að úthluta stofu fyrir staðbundin próf eða tækniaðstoð vegna Inspera.
Athugið að hér er eingöngu fjallað um framkvæmd rafrænna prófa en kennarar þurfa alltaf að hafa í huga að námsmat í námskeiðum þarf að vera fjölbreytt og vera í samræmi við þau hæfniviðmið sem liggja til grundvallar í námskeiðinu.